歐霸盃8強次回合，阿士東維拉主場迎戰博洛尼亞，英超「老四」阿士東維拉首回合作客都贏到3比1，證明實力高對手兩班，今仗有地利優勢，贏面更加大。尤其係博洛尼亞焗攻之下，防線難免暴露更多空位，以維拉跨季歐洲賽主場8連勝走勢，有力再下一城，熱捧主勝。

（Now 643周五凌晨3時直播）文:Mic少

阿士東維拉首回合造訪意大利，即使全場只有8次射門，唔及博洛尼亞一半，但仍然以3比1勝出，雙方攻門把握力高下立見，今仗再次交鋒，預料維拉會繼續佔上風。值得一提，由於日前已落實今季英超前5位可以參加下屆歐聯，維拉領先第6位車路士7分，獲得歐聯入場券機會樂觀，唔需要留力踢聯賽，可以專注爭奪歐霸盃錦標，今仗應會全力爭取盡快入波領先，等對手無法翻身。

博洛尼亞焗攻仲易失守
至於意甲球隊博洛尼亞為收復失地，惟有壓前搶攻，但防線不穩，近期失球數字頗多，當中聯賽對弱隊克雷莫納亦未能保持清白之身，今仗搶攻隨時得不償失。

況且，博洛尼亞素來有「恐英症」，曾經4次歐洲賽對英超球隊，結果全敗收場，僅入1球，當中3次輸畀阿士東維拉，除咗上周首回合1比3敗陣之外，仲有2024年歐聯作客吞兩蛋，以及今屆歐霸盃「聯賽階段」作客輸0比1，今仗重返「傷心地」，恐怕難逃再敗厄運。