深陷降班危機嘅熱刺，今輪將喺主場迎戰白禮頓。排尾3嘅熱刺依家陣容天殘地缺，近8聯賽1和7負，今場最大目標係先「止血」，唔會冒險盲目搶攻。近況勇猛嘅白禮頓踢法向來穩陣，作客會穩中求勝，今場開2.5球嘅入球細機會高。

（Now 621及631周日凌晨零時30分直播）文:工廠仔

熱刺依家距離安全區2分，最後6輪仍有時間向上爬，新帥迪薩比當務之急係要穩住軍心，今場要終止連敗走勢，鞏固防守會係最大任務，尤其熱刺已經連續2場聯賽「食白果」，進攻效率畀唔到人信心，更加要加強防守搶分。迪薩比曾經執教白禮頓，深明對手反擊效率極高，相信今場會以守為攻。

白禮頓作客勁硬淨
另邊廂，白禮頓近況係英超數一數二突出，近6場聯賽贏5場，包括聯賽作客3連勝。白禮頓喺靴斯拿執教下，防守非常穩陣兼效率極高，最近作客3連勝當中1球未失，近4場聯賽作客總入球全開2球或以下。白禮頓仍有機會爭歐洲賽資格，今場會繼續奉行穩中求勝策略，入球細穩開。