南美自由盃A組重頭戲，上屆冠軍法林明高主場迎戰學生隊，巴甲勁旅法林明高3戰2勝1和排榜首，可以睇定嚟踢；至於阿甲球隊學生隊4戰只有1勝，今仗贏面唔大。考慮到學生隊守強攻弱，各項賽事近6場總入球全開2球或以下，一於追中位數2.5球嘅入球細。

（周四早上8時30分開賽）文:Mic少

法林明高曾於4月創出各項賽事7連勝佳績，可惜無以為繼近5仗僅勝1場，而且只係小勝巴甲下游球隊甘美奧1比0，整體狀態處於調整之中，有地利亦不宜高估。同埋睇番小組形勢，法林明高領先第3位麥德林獨立3分，以前2位出線機會樂觀，今仗冇必要急於求勝，就算打和亦冇壞，預料會採取穩陣踢法。

學生隊攻力疲弱
至於第2位學生隊落後法林明高1分兼踢多1場，搶分逼切性較大，但球隊近5場僅入4球，包括自由盃分組賽首循環主場逼和法林明高1比1，今仗作客要入波更難。事實上，學生隊踢4場自由盃分組賽只有1勝3和，當中僅主場贏過包尾嘅FC古斯哥，無獨有偶，另外3場都踢成1比1，預料今場好大機會又出現拉鋸戰局面，入波唔會多。