聽朝有場國際熱身賽，加拿大主場迎戰愛爾蘭，身為今屆世盃主辦國之一嘅加拿大，將於下周六凌晨出戰首場分組賽，相信今仗會避重就輕，減少體力消耗，尤其係避免出現傷兵。至於愛爾蘭冇份踢世盃，抱住「度假心態」唔會搏命，參考加拿大近9場有8次開2球或以下，最好揀中位數2.5球嘅入球細。

（周六早上7時30分開賽）文:臻贏特

加國實力麻麻，上屆世界盃3戰全敗出局，現時隊內最具知名度球員係效力拜仁慕尼黑嘅艾方素戴維斯，但呢位左後衞近年備受傷患問題困擾，今次亦係帶傷入選國家隊，預料唔會踢熱身賽。另一位「球星」係祖雲達斯前鋒約拿芬大衞，但佢狀態持續低迷，今季為祖記上陣46次僅入8球，恐怕難以對愛爾蘭防線構成太大威脅。

愛爾蘭「陪練」戰意欠奉
加拿大領隊馬殊亦深知球隊人腳質素有限，所以往往採取穩陣踢法，近9場取得4勝4和1負，其中8次開2球或以下，值得留意4場勝仗有兩場係小勝1比0，另外兩場贏2比0，唔好期望會大炒愛爾蘭。

愛爾蘭「陪太子讀書」戰意不足，加上遠赴加拿大比賽，球員飽受舟車勞頓之苦，亦會影響發揮。愛爾蘭早前熱身賽僅小勝卡塔爾1比0，近3場保持不失球，屬於守強攻弱球隊，捧入球細啱數。