墨超首開咧，第一日就有大戰，迪祖亞拿對堤格雷斯。傳統勁旅堤格雷斯上季首階段季後賽屈居亞軍，今季捲土重來，迪祖亞拿進攻主力離隊，加上2名參加世盃球員將缺陣，進一步削弱實力，堤格雷斯有望反客為主，推介客勝。文:渡邊年

（周五早上11時10分開賽）

迪祖亞拿兩世盃腳缺陣
迪祖亞拿上季次階段排第9位，成績不過不失，但17場聯賽和8場，最終排第9，令佢哋同季後賽擦身而過。迪祖亞拿本身攻力已經唔算好，進攻核心奇雲卡斯坦尼更離隊轉投瓜達拉哈拉，雖然從對方簽番耶爾柏迪耶，但級數唔同，而且仲要由頭夾過，默契有待建立。「獵犬」迪祖亞拿更受到世盃影響，厄瓜多爾後衞保路素及墨西哥小將基拔圖摩拉，因早前參加世盃，預期今仗會缺陣，球隊調動亦受到牽連。

堤格雷斯以不變應萬變，轉會市場冇太大動作，以原班人馬再度衝擊冠軍，佢哋上季墨超首季後賽決賽，互射12碼飲恨，墨超次則8強止步，今季以重奪冠軍為目標，開咧第一擊肯定要贏得好好睇睇，加上近7次對迪祖亞拿贏5次，信心贏晒，放心捧客勝。