世盃季軍戰，法國火併英格蘭，勝負無關痛癢，法國隊長基利安麥巴比要爭奪神射手殊榮，仲有累積5球嘅奧士文尼迪比利，肯必盡情數胡；至於英格蘭2位進攻主力哈利卡尼同祖迪比寧咸腳風亦非常順，4人大鬥射術實多入波，加上近12屆世盃季軍戰有11次總入球開3球或以上，2.5球入球大係不二之選。（Viu TV 99、Now 618及616周日清晨5時直播）文:Mic少

法國原本被視為奪冠大熱，現時淪為爭「銅牌」，難免令人失望。不過今仗係領隊迪甘斯告別戰，佢今場之後結束14年法國主帥生涯，當然想好好睇睇，球員應會識做落力爭勝。

麥總力爭蟬聯金靴獎
此外，麥巴比今屆有8球在手，同美斯並列射手榜首位，由於「麥總」只有3次助攻，比美斯少1次，所以麥巴比更加要把握季軍戰嘅機會刷數據，盡量入波，力爭蟬聯金靴獎，至於奧士文尼迪比利手執5球，同樣有數胡能力，想爭做神射手今場一定要博命。

另邊廂，英格蘭上場4強1比2不敵阿根廷，領隊杜曹被批評戰術保守導致領先下倒輸，所以今場應會擺大個頭搶攻省番靚個招牌，事實上「三獅兵團」今屆已攻入14球，創出隊史單屆大賽（世盃及歐國盃）最多入波紀錄，哈利卡尼、祖迪比寧咸各有6球進帳，攻力有保證，不過佢哋防線欠穩，近4場都有失波，恐怕難保清白之身，總之今場4大射手開Party，大家等睇入球騷。