除咗歐洲波之外，仲有南美波玩，就係烏拉圭季後賽，其中B組蒙特維多城托基主場迎戰達奴比奧。蒙特維多城托基為爭入季後賽決賽必定搏盡，不過近期有前冇後，尤其係初段經常入得又失得，轉捧1.5球半場大最上算。（周二凌晨3時57分開賽）文:渡邊年
烏拉季係分兩組踢單循環，每組首名先可以進身決賽，蒙特維多城托基喺B組排第4位，剩番兩輪情況下，落後打多1場嘅「1哥」蒙特維多流浪者3分，如果今仗大勝5粒或以上，就可以壓過蒙特維多流浪者升上榜首，就算贏唔到5球，都仲有1輪畀佢哋去追，總之兩場贏晒兼盡量大炒就掂。

蒙特維多城托基近4場季後賽取得3勝1負，睇落都唔錯。不過佢哋最大嘅問題係踢法太進取，呢4場入9球但失番7球，而且全部都畀對手上半場入到波，其中3次上半場開出2球或以上，亦睇得出班波初段急於搶攻嘅特點。好彩今輪對手達奴比奧只係包尾大幡，肯定無緣爭入決賽，難得遇弱必更加肆無忌憚進攻，半場大有計。

迪芬沙近5場半和
另一場係A組賽事，由迪芬沙士砵亭主場鬥蒙特維多利物浦。見到又士砵亭又利物浦，唔好以為好勁，查實兩軍喺A組排緊尾3同包尾，亦肯定無緣決賽，呢場只係例行公事唔慌會搏，迪芬沙士砵亭近5季後賽全開半場和，蒙特維多利物浦近4季後賽亦有3次開半和，既然咁旺不妨再追。