「亞冠盃2」上演8強首回合，曼谷聯主場迎戰淡濱尼流浪，新加坡球隊淡濱尼流浪今屆表現出色，由分組賽開始至今8戰取得7勝1和，展現爭標霸氣。反觀，泰國球隊曼谷聯狀態走下坡，各項賽事近4場僅1勝，冇本錢讓波，淡濱尼流浪讓球客勝（+2）值博。

（HOY TV 76台周四晚8時15分直播）文:Mic少

曼谷聯主場冇優勢
曼谷聯即使位居國內聯賽前列，但其實已經被榜首武里南聯拋離13分，整體實力平庸，今屆「亞冠盃2」分組賽6戰只有3勝1和2負，以小組次名出線，當中3次主場出擊僅1勝，發揮唔出地利優勢。曼谷聯上圈16強能夠淘汰澳職球隊FC麥克阿瑟，好大程度上因為對手狀態及表現更差，晉級「水分」甚重，不宜高估。

另邊廂，淡濱尼流浪上月中換帥，教練拉文離隊，由39歲助教伊沙高接手擔任看守教練，但球隊表現並冇受影響，新帥領軍之下保持強勢，上圈16強次回合以3比1擊敗越南球隊河內公安，兩回合合計大勝6比1，上場聯賽派3蛋，各項賽事近6場得5勝1和，今仗有力全身而退，贏埋都唔出奇。