葡超「強強對碰」，賓菲加主場迎戰波圖。賓菲加落後波圖7分，今場爭標6分波，教練摩連奴要藉主場之利，一舉擊沉波圖展開救贖，否則今季將無冠落袋，幸球隊主場4連勝，有力殺敗剛於葡盃不敵士砵亭嘅波圖，讓平半上盤可取。（周一凌晨2時開賽）文:臻贏特

今場對碰葡文為「O Classico」，字面意譯為「經典」。兩支奪得聯賽冠軍最多嘅球隊交手，今季首循環踢成0比0，而今年1月葡盃8強，波圖喺主場小勝1球，可以睇到兩軍實力非常接近。賓菲加係歐洲7大聯賽，今季唯一一支仍然保持聯賽不敗嘅球隊，如果再計埋上季，「里斯本雄鷹」更加係39場葡超不敗，但由於和波較多（17勝7和），現時落後波圖7分。

波圖3線作戰難兼顧
無巧不成話，波圖周中葡盃4強首回合，就0比1不敵士砵亭，下周佢哋仲要歐霸16強作客史特加，今場又硬撼賓菲加，3線作戰實在難以兼顧。相反賓菲加歐聯附加賽被皇馬淘汰，本地盃賽亦全部出局，得番聯賽肯定搏盡，而且佢哋近8次主場出擊贏7次，上盤值得支持。