今晚歐聯16強首回合爆發重量級對決，皇家馬德里主場迎戰曼城，兩隊近年成為歐聯冤家，近4季總共對賽9次，互有勝負熟晒路，兩隊同樣崇尚進攻，雖然「銀河艦隊」射手基利安麥巴比受傷缺陣，仍會主動出擊，「藍月亮」勝在入局快，近7場歐聯6次半場開2球或以上，1.5球半場大屬明智之選。（Now 643周四凌晨4時直播）文:邪神

兩支頂級豪門近年遭遇驚人相似，上季同樣「四大皆空」，今季喺所屬聯賽同樣排第2，有所唔同嘅係，皇馬經歷兩度換帥，之前領軍同曼城多次交手嘅安察洛堤已經離隊，今季上任嘅沙比阿朗素執教不足8個月被炒，臨時接手嘅艾比路亞根本管唔住「銀河艦隊」班大帝，近期純粹畀班球員「自由發揮」，冇咩戰術可言，其中防守好唔穩陣，近4場上半場都有失波，今次對手係「藍月亮」，佢哋條豆腐防線更加守唔住，唯有以攻代守。

捧埋藍月「第一隊入球」
至於曼城今季仍有機會成為「四冠王」，哥迪奧拿今場決定「晒冷」，派出最強陣容到訪巴拿貝球場，艾寧夏蘭特、馬莫殊、洛迪卡斯簡迪悉數候命，再睇番佢哋近3次作客皇馬，上半場全開2球或以上，今場捧半大相當合理；亦由於「銀河艦隊」嘅麥巴比同祖迪比寧咸受傷缺陣，艾寧夏蘭特可以一個玩晒，不妨捧埋曼城「第一隊入球」。