今晚英超10點場上演「爭4關鍵戰」，3哥曼聯主場硬撼第4嘅阿士東維拉。維拉係上周中歐洲賽9支英超代表中唯一贏波球隊，雖然保住主帥艾美利「歐霸之王」個招牌，但球員耗力唔少，反觀「紅魔鬼」養精蓄銳出擊，再加近4場主場全勝，主勝屬不二之選。（Now 621及611周日晚10時直播）文:邪神

兩隊賽前同得51分，曼聯憑較佳得失球壓住維拉排第3，不過排5及6位嘅車路士同利物浦，都只係落後3分，今場贏波一方可鞏固第3位置，相反輸嘅話隨時被車利趕上，名副其實係爭歐聯席位嘅「6分波」，絕對冇得保留。

先講維拉，佢哋自2月起成績急跌，聯賽連場失分下已經無力挑戰英超寶座，對於球隊突然跌Watt，連艾美利都解釋唔到，仲話隨時連歐聯席位都不保，所以將目標放喺歐霸盃身上，結果佢哋上周中歐霸盃16強首回合，憑奧尼屈堅斯打破6場入球荒，作客1比0險勝里爾，今場對完曼聯，周中又嚟次回合，球員難免疲於奔命。

球員搏老命撐卡域克坐正
曼聯今季唔使踢歐洲賽，本土盃賽又晨早出局，上場作客輸完畀紐卡素後，球員足足有10日休息先踢今場，消息指看守領隊卡域克希望攞到歐聯資格爭取「坐正」，班球員都好撐佢，連季尾約滿離隊嘅卡斯米路都搏晒命，依家全隊上下一心，主場出擊更添勝算，有力砌低維拉保住3哥席位，一於熱捧主勝。