今晚英超獨腳戲，阿士東維拉主場火併利物浦。雖然屬前列對決，但維拉個心已經飛咗去下周中歐霸盃決賽，今仗隨時出副選hea踢，不過紅軍客場例差多失波，轉捧2.5球嘅大盤為妙。

（Now 621及611周六凌晨3時直播）文:臻贏特

先講聯賽形勢，利物浦與維拉同得59分，排喺第4及第5位，而且甩開第6嘅般尼茅夫4分，剩番2輪之下，前5嘅下屆歐聯入場券都幾穩陣。

維拉揸流攤等踢歐霸決賽
雖然維拉煞科日要對曼城，但唔好忘記，佢哋下周中歐霸盃決賽對弗賴堡，贏咗同樣可以踢歐聯，加上主帥艾美利之前5次帶隊殺入歐霸盃決賽，4度封王，梗係想帶領維拉一搔40多年之癢，再嘗歐洲賽冠軍滋味，睇埋4強次回合前嘅聯賽對熱刺，艾帥正選收起奧尼屈堅斯等主力，以副選迎戰，今仗好大機會照辦煮碗。

就算維拉揸流攤，都唔代表利物浦一定贏，佢哋各項賽事近9仗贏得3場咁大把，日前聯賽對住頹到冇朋友嘅車路士，亦只能各一言和，見到都唔開胃。再睇埋佢哋近6次客場，竟然錄得1勝5負劣績，場場有失波，實在捧唔落手。翻查紀錄，維拉近4次主場出擊，全開3球或以上，而紅軍近5場作客亦有4次開3球或以上，揀大盤更上算，進取啲可捧埋1.5球嘅半場大。