英超榜首阿仙奴今晚再度出擊，作客硬撼白禮頓。阿仙奴依家畀次席曼城步步進逼，防守又冇季初咁穩陣，近期索性全民皆攻，撞正「海鷗」有老將韋碧克倒戈，隨時合演入球騷，捧2.5球大盤最上算。（Now 623周四凌晨3時30分直播）文:法達斯維

隨住曼城重啟連勝程式，令領先5分但打多1場嘅阿仙奴備受壓力，防線近期周不時「發波瘟」，加上「亞軍奴」心魔一日未除，嚟到爭冠關鍵時刻，壓力只會愈來愈大。既然係咁，主帥阿迪達惟有靠強大火力，彌補防守不足，各項賽事近7仗得2場冇失波，其中6次開3球或以上，單計客場近5仗更有4次開4球或以上添。無論係前線嘅約基利斯、伊比爾治伊斯、布卡約沙卡，抑或「角球部隊」祖利安添巴及加比爾馬加希斯等後衞，個個都能夠分擔入波重任。

韋碧克倒戈「槍手」冇情講
白禮頓上輪聯賽喺主場擊敗諾定咸森林，但其實近5仗2勝3負表現一般，而且近6次對阿仙奴僅得2和4負，場場都有失波，明顯被「兵工廠」食住，主場亦難保清白之身。好彩35歲嘅韋碧克重拾射門鞋，呢位昔日「槍手」今季入球達雙位數，成為繼占美華迪後，第2位連續2季英超入波「10+」嘅33歲或以上球員，無懼同舊東家駁火，大盤好路。