卡域克揸旗 魔性返晒嚟
今晚英超快車重頭戲，紐卡素主場鬥曼聯。「紅魔鬼」延續「新帥蜜月期」，卡域克接手執教以來，聯賽7戰取得6勝1和，已經殺入前3，愈踢愈有信心。反觀「喜鵲」近期3線作戰，球員疲態畢露，英超更遭逢2連敗，今場開平手盤，梗係捧當頭起嘅曼聯。（Now 621及611周四凌晨4時15分直播）文:Mic少

紐卡素本身人腳唔算充裕，近期仲要兼顧英超、歐聯及英足盃3條戰線，過去4周已經踢咗8場波，換言之平均一周雙賽，當中不乏硬仗，包括早前聯賽作客1比2輸畀曼城，佢哋嚟緊周日凌晨英足盃16強再遇「藍月亮」，「地獄賽程」下球員體力負荷非常大，尤其係相比英超單線作戰嘅曼聯，就更加蝕章。

紐卡素遇強即屈
事實上紐卡素明顯陷入低潮，近6場聯賽輸足5場，包括不敵3支前列球隊阿士東維拉、利物浦及曼城，只係贏過同樣頹到爆嘅熱刺，名副其實遇強即屈，上仗有波入嘅積及藍斯勇戰受傷，今場上陣成疑，點擋得住「魔性回歸」嘅曼聯。

曼聯近兩場對愛華頓及水晶宮，雖然陷入苦戰，但仍然贏波，特別係上場鬥水晶宮，落後下多得對手「送禮」，中堅麥辛斯拿確斯輸12碼之餘仲領紅牌出場，造就「紅魔鬼」反敗為勝，連運都有埋。事實上曼聯中前場球員近況勇銳，班捷文施斯高近5場轟入4球，隊長般奴費南迪斯上場入波兼助攻，馬菲奧斯根夏及麥比奧莫都有威脅，令對手防不勝防，紐卡素防線脆弱，近3仗夾埋失7粒，曼聯呢3分可謂手到拿來。